بۇل تۋرالى مادەنيەت جانە سپورت ءمينيسترى اقتوتى رايىمقۇلوۆانىڭ جاقىندا ىستانبۇلدا وتكەن Korkut Ata Turkic World Film Festival اياسىندا تۇرىك ارناسى وكىلدەرىمەن كەزدەسۋىنەن كەيىن بەلگىلى بولدى. كەزدەسۋگە «قازاقفيلم» كينوستۋدياسىنىڭ باسشىلىعى - پرەزيدەنت اقان ساتاەۆ پەن ۆيتسە-پرەزيدەنت ايدار باتالوۆ قاتىستى.
«قورقىت اتا» فەستيۆالىنىڭ شىمىلدىعىن سالتاناتتى تۇردە اشقان «توميريس» ءفيلمى تۇرىك جۇرتشىلىعىنا جاقسى تانىس ەكەنىن ايتا كەتۋ كەرەك. قىركۇيەكتە ماسساگەت پاتشايىمى تۋرالى فيلم تۇركيا كينوتەاترلارىندا كورسەتىلىپ, كورەرمەندەردىڭ قىزىعۋشىلىعىن تۋعىزعان. فيلم تۇركيانىڭ 200-دەن اسا كينوتەاترلارىندا كورسەتىلدى.
سونىمەن قاتار, فەستيۆال اياسىندا تۇركى الەمى ەلدەرىنىڭ كينەماتوگرافيا سالاسىنداعى ىنتىماقتاستىعىن دامىتۋعا جاڭا سەرپىن بەرەتىن ماڭىزدى قۇجاتقا قول قويىلدى. كەلىسىمگە مادەنيەت جانە سپورت ءمينيسترى اقتوتى رايىمقۇلوۆا, ازەربايجان رەسپۋبليكاسىنىڭ مادەنيەت ءمينيسترى انار كەرىموۆ, مادەنيەت, اقپارات, سپورت جانە جاستار ساياساتى ءمينيسترى ازامات جامانقۇلوۆ, «وزبەككينو» ۇلتتىق اگەنتتىگىنىڭ باس ديرەكتورى فيرداۆس ابدۋحاليكوۆ جانە تۇركيانىڭ مادەنيەت جانە تۋريزم ءمينيسترى مەحمەت ەرسوي قول قويدى.
قۇجات اياسىندا تاراپتار تۇركى الەمى كينويندۋسترياسىنا قولداۋ كورسەتەتىن بىرلەسكەن قور قۇرۋعا كەلىستى.
سونداي-اق, فەستيۆال اياسىندا اقتوتى رايىمقۇلوۆا «قازاقفيلم» كينوستۋدياسىنىڭ باسشىلىعىمەن بىرگە بەلگىلى تۇرىك كينەماتوگرافيستەرىمەن جانە فەستيۆال قاتىسۋشىلارىمەن كەزدەسىپ, بىرلەسكەن كينوجوبالاردى جۇزەگە اسىرۋ ماسەلەلەرىن تالقىلادى.
ەسكە سالايىق, بيىل تۇركيانىڭ مادەنيەت جانە تۋريزم مينيسترلىگى العاش رەت ۇيىمداستىرعان Korkut Ata Turkic World Film Festival-دە 13 ەلدەن 42 كينوكارتينا كورسەتىلدى. بايقاۋ باعدارلاماسىندا «قازاقفيلمنىڭ» كەلەسى فيلمدەرى كورسەتىلدى: رەجيسسەر رۇستەم ءابدىراشوۆتىڭ «قازاق حاندىعى. التىن تاق» دەرەكتى ءفيلمى, رەجيسسەر باقىت قايىربەكوۆتىڭ «وگون, مەرتسايۋششي ۆ سوسۋدە» دەرەكتى ءفيلمى, رەجيسسەر اداي ابەلدينوۆتىڭ «كۇلتەگىن» تولىق مەتراجدى انيماتسيالىق ءفيلمى, رەجيسسەر ساتىبالدى نارىمبەتوۆتىڭ «امانات» كينوتاسپاسى جانە ت.ب. بار.
فەستيۆالدىڭ سالتاناتتى جابىلۋ ءراسىمى كەزىندە "قازاقفيلم" كينوستۋدياسى تۇركى الەمى كينەماتوگرافياسىنا قوسقان ۇلەسى ءۇشىن ارنايى سىيلىقپەن ماراپاتتالدى. بەلگىلى تۇرىك اكتريساسى فاحريە ەۆدجەن كينوستۋديا پرەزيدەنتى اقان ساتاەۆقا Respect Award مۇسىنشەسىن تابىستادى.
